Lo Namba 8 Maj 2025, Vanuatu Women’s Centre mo ol stakeholders, ol fren, mo ol famili oli bin kam tugeta mo tekpat long wan “Reclaim the Night March” we i stat long Independence Park (PMC) kasem Saralana Park. Maj ia hemi blong yumi tokbaot ol rabis fasin we i stap hapen long ol woman mo ol pikinini mo blong tokbaot se ol woman, pikinini boe mo gel oli gat raet blong wokabaot sef long naet o long eni pablik spes.
Pablik oli kwestinem se from wanem nao oli wokabaot wetem ol candle long rod long naet?
Ol woman, ol gel mo ol pikinini boe oli wantem wokabaot sef long ol rod mo ol pablik ples long naet. Lo taem ia tu, yumi tingbaot olgeta we oli bin lusum laef long ol rod mo ol pablik ples tru long rabis fasin blong ol vaelens.
Lo 2023 kasem 2024, Senta hemi lukim 6315 klaens we oli kam aksesem sevis blong Vanuatu Women’s Centre. Domestik Vaelens hemi save hapen eni ples lo kantri blong yumi.
Senta istap aknolejem Australian High Commission, New Zealand High Commission, Vanuatu Police Force, Wife mo Minister blong Justice mo Community Services, ol nara okenaesesen, ol famili mo pablik we oli bin save kam tekpat mo witnessem maj ia.
Tugeta yumi wokabaot from Jenda ikwaliti, Vanuatu Women’s Centre, Vanuatu Police Force mo ol nara patna i nosave mekem wok hem wan, yumi nidim evriwan i wok tugeta blong doanem ol rabis fasin we istap gohed lo kantri blong yumi.